Oft, wenn ma an sei Hoimet denkt,
Ma weit da Blick nach rückwärts lenkt,
Zu dera Zeit, wo ma als Kend
Sich wohlgeborga wiederfend't.
Wia ma romgschpronga auf dr Gass,
De würzig Landluft en dr Nas.
En d' Moiakäfer, morgens bald
Isch ma zum Schüttla en da Wald.

Kornbluama, - Rada, Rittersporn
Und Mohn hant so schö blüat em Korn.
Auf Erntewäga hoim en d' Scheuer,
Und nach dr Ernt d' Kartoffelfeuer!
Mit Rüabagoischter nachts om d' Ecka,
De andre Leut a weng z' verschrecka.
Zeitig hat ma 's Zuapacka glernt
Em Stall, beim Heua, bei dr Ernt.

A weng verklärt wird wohl dr Blick
Guckt ma so en sei Kendheit z'rück,
Na fällt's oim schwer, sich drüber z' freua,
Wenn ,s Alte weicha muaß am Neua...
Doch ka 's ja wohl koin Zweifel geba,
Jeder möcht mit am Fortschritt leba!

Mit guatsortierte Läda, Banka,
Om 's Eck glei d' Glegaheit zum Tanka.
Oigene Arzt und Apothek
Ersparet oim jetzt lange Weg.
Mit Gasthöf an gepflegte Straßa,
Sport-Plätz und - Halla gleichermaßa.
Drei Schuala und a Lehrschwimmbad
Ellas Stoina heut selber hat.
Frühr und au heut, mei Dorf isch sche,
Mi freuts, daß i drhoim do be!